पोखरा । पौडी खेल्ने क्रममा पोखरामा एकजना भारतीय नागरिकको मृत्यु भएको छ । मृत्यु हुनेमा भारत उत्तर प्रदेश लखनउ घर भई पोखरा भ्रमण गर्न नेपाल आएका वर्ष २३ का देवान सिंह रहेका छन् ।
जिल्ला प्रहरी कार्यालय कास्कीले दिएको जानकारी अनुसार मङ्गलबार दिउँसो अन्दाजी साढे एक बजेको समयमा यो घटना घटेको हो । पोखरा महानगरपालिका वडा नं. १७ पावरहाउस रिसोर्ट भित्र रहेको स्विमिङ पुलमा पौडी खेल्ने क्रममा अचानक पानीमा डुबेको र निजको साथीले देखी तत्काल पानीबाट बाहिर निकाली उपचारको लागि गण्डकी मेडिकल कलेजमा लगेकोमा उपचारको क्रममा झण्डै ४ बजेको समयमा डाक्टरद्वारा मृत घोषणा गरिएको प्रहरीको भनाइ छ।
मृतकको शब मणिपाल अस्पतालमा पोष्ट मार्टम पश्चात मृतकको बाबा रुकमेन्द्र प्रताब सिंहल बुझी भारत तर्फ लगेको कास्की प्रहरीले जानकारी दिएको छ । घटना सम्बन्धमा थप अनुसन्धान कार्य भइरहेको समेत बताइएको छ ।
