पोखरा । पोखरामा श्रीमतीलाई धारिलो हतियार प्रयोग गरि हत्या गरेको आरोपमा श्रीमान् पक्राउ परेका छन् । बुधबार अन्दाजी सवा १२ बजेको समयमा कास्कीको अन्नपूर्ण गाउँपालिका वडा नं.१ नौडाँडा घर भई हाल जिल्ला कास्की पोखरा महानगरपालिका वडा नं.८ बगाले टोलमा डेरा गरी बस्ने वर्ष ४० की राधिका कुँवरको हत्या भएको हो ।
राधिकालाई उनका श्रीमान् वर्ष ४२ को जहरसिंह कुँवरले डेरा कोठामा नै विवाद हुँदा घाँटीमा र पेटमा धारिलो हतियार खुकुरी प्रहार गरेर घाईते बनाएको जिल्ला प्रहरी कार्यालय कास्कीले जनाएको छ । घाइते राधिकालाई तत्काल उपचारको लागि पश्चिम क्षेत्रीय अस्पताल पठाएकोमा चिकित्सकले चेकजाँच गर्दा पौने एक बजे मृत घोषणा गरेको प्रहरीको भनाइ छ ।
घटना पश्चात् वडा प्रहरी कार्यालय बैदाम कास्कीबाट प्रहरी टोली खटिई हत्या आरोपी जहरसिंह कुँवरलाई खुकुरी सहित नियन्त्रणमा लिई थप अनुसन्धान कार्य गरिरहेको कास्की प्रहरीले जनाएको छ । निजहरूको १ जना छोरा रहेका छन् । घटनाको बारेमा अन्य थप अनुसन्धान भइरहेको र विस्तृत विवरण पछि जानकारी गराउने कास्की प्रहरीको भनाई छ ।
