पोखरा । नेपाल कम्युनिस्ट पार्टी (एमाले) जिल्ला कमिटी कास्कीले यहीँ कार्तिक १० गते शनिबार शुभकामना आदानप्रदान र चियापान कार्यक्रम आयोजना गर्ने भएको छ । एमाले कास्की अध्यक्ष बैनबहादुर अधिकारी क्षेत्रीका अनुसार शुभ दिपावली, नेपाल सम्वत् ११४५, छठ, ईद लगायतका चाडपर्वको अवसरमा यो कार्यक्रम आयोजना गर्न लागिएको हो ।
यसअगाडि गत असोज १७ गते दशैंको घटस्थापनाको दिनमा गर्ने तय भएको कार्यक्रम असोज ११ र १२ गते देशका विभिन्न ठाउँमा बाढी पहिरो लगायतका कारण जनधनको क्षति भएपछि स्थगित भएको थियो ।
पोखरा सभागृहमा बिहान साढे सात बजेपछि सुरु हुने कार्यक्रममा नेकपा एमालेका वरिष्ठ उपाध्यक्ष एवं पूर्व उपप्रधानमन्त्री ईश्वर पोखरेल प्रमुख अतिथिको रुपमा सहभागी बन्नेछन् । कार्यक्रममा एमालेका केन्द्रीय नेताहरू, मन्त्रीहरू, सांसदहरू, प्रदेशका नेताहरूका अलावा कास्कीमा रहेका विभिन्न राजनीतिक दलका नेता समेत सहभागी बन्ने अध्यक्ष अधिकारीको भनाइ छ ।
