पोखरा । पोखरा महानगरपालिका १५ नयाँगाउँमा सम्पन्न विकास प्रिजेन्टस् सिक्स ए साइड एमेच्योर फुटबल प्रतियोगितामा प्रेसियस ब्युटी स्टुडियो च्याम्पियन बनेको छ ।गोर्खाज बुटक्याम्पको खेलमैदानमा आज भएको फाइनल खेलमा चाउथे एफसीलाई २–१ गोल अन्तरले पराजित गर्दै ब्युटी स्टुडियो च्याम्पियन बनेको हो ।
कार्यक्रम संयोजक रोमन मगरका अनुसार ब्युटी स्टुडियोको जितमा अङ्कित गुरुङ र युनिक तामाङले समान १ गोल गरे भने चाउथेका लागि सुजन गुरुङले सान्त्वना १ गोल फर्काए ।च्याम्पियन बनेको ब्युटी स्टुडियोले नगद रु ६० हजार, शिल्ड तथा प्रमाणपत्र जित्यो । यस्तै उपविजेता बनेको चाउथेले नगद रु ३० हजार, शिल्ड, मेडल तथा प्रमाणपत्र पायो ।
कुल २६ टिमको सहभागिता रहेको सो प्रतियोगिताको विजेता तथा उपविजेता टोलीलाई नेपाल किसान महासङ्घ युवा समिति केन्द्रिय सदस्य प्रितम गुरूङ, नेपाली कङ्ग्रेसका वडा १५ का सभापति सुशीलराज पराजुली, नेपाल लोकतान्त्रिक खेलकुद सङ्घ जिल्ला कास्की सचिव राजेश गौतम, नेपाली काङ्ग्रेसका वडा १५ का कोषाध्यक्ष टेक बहादुर भण्डारी, क्षेत्रीय प्रतिनिधि कल्पना अधिकारी बानियाँ, राजेन्द्र पराजुली, सन्तोष मिया, नयाँगाउँ क्लबका कोषाध्यक्ष सन्तोष गुरुङ, दोस्रो पुरस्कार प्रायोजक इन्द्र कुमारी गुरुङ, फ्याङ्कलिन एजुकेशनका अध्यक्ष गङ्गा बहादुर खड्का, नयाँगाउँ क्लबका सदस्य विदुर गुरुङ लगायतले पुरस्कार वितरण गरेका थिए ।
प्रतियोगितामा विधागततर्फको पुरस्कार समय अभावका कारण घोषणा गर्न नसकेको जानकारी गराउँदै शुक्रबार एक कार्यक्रमकाबीच पुरस्कृत गरिने प्रतियोगिताका परिकल्पनाकार विकास गुरुङले जानकारी दिए । उनका अनुसार उत्कृष्ट खेलाडी, उदीयमान खेलाडी, उत्कृष्ट गोलरक्षक, उत्कृष्ट डिफेण्डर तथा सर्वाधिक गोलकर्तालाई जनही ३ हजार रुपैयाँले पुरस्कृत गरिनेछ । अनुशासित टिमलाई नगद रु ५ हजार प्रदान गरिनेछ ।
