पोखरा । आगामी फागुन २१ गतेका लागि तोकिएको प्रतिनिधिसभा निर्वाचनको सञ्चालन तथा व्यवस्थापनका लागि कास्कीका तीनवटै निर्वाचन क्षेत्रमा निर्वाचन अधिकृतको कार्यालय स्थापना गरिएको छ ।
निर्वाचन क्षेत्र नम्बर १ का लागि पशुपक्षी अनुसन्धान, विकास तथा प्रशिक्षण केन्द्र रामघाट, क्षेत्र नम्बर २ का लागि सिँचाइ तथा जलस्रोत व्यवस्थापन आयोजनाको कार्यालय ड्यामसाइड र क्षेत्र नम्बर ३ का लागि गण्डकी प्रदेशको कृषि, भूमि व्यवस्था तथा सहकारी मन्त्रालयको प्रशासन तथा सहकारी विकास महाशाखाको कार्यालयमा निर्वाचन अधिकृतको कार्यालय स्थापना गरिएको हो । क्षेत्र नम्बर ३ को कार्यालयमा मुख्य निर्वाचन अधिकृतको कार्यालयसमेत रहेको छ ।
कास्कीमा मुख्य निर्वाचन अधिकृतमा कास्की जिल्ला अदालतका न्यायाधीश हिमलाल बेलबासे रहेका छन् । यसैगरी निर्वाचन क्षेत्र नम्बर १ का लागि सीता रेग्मी र क्षेत्र नम्बर २ कालागि निर्मलाकुमारी खड्का निर्वाचन अधिकृत तोकिएका छन् ।
निर्वाचन अधिकृतको कार्यालय स्थापना पश्चात आयोजित कार्यक्रममा बोल्दै कास्कीका मुख्य निर्वाचन अधिकृत बेलबासेले निर्वाचनलाई निष्पक्ष, स्वतन्त्र र भयरहित वातावरण सम्पन्न गर्नमा सबै पक्षको सहयोग र समन्वय आवस्यक रहेको बताए । मुख्य निर्वाचन अधिकृतको कार्यालय स्थापनापछि बोल्दै उनले यसका लागि राजनीतिक दलहरू खेलाडीको भूमिकामा रहने जनाए । उनले जनताले चुनेका प्रतिनिधिबाट देशको कानुन बन्ने र जनताले अनुभूति हुनेगरि कानुनी शासनको सर्वोच्चता हुने बताए ।
कास्कीका प्रमुख जिल्ला अधिकारी रुद्रादेवी शर्माले ३ लाख ८ हजार ५ सय ७२ जना मतदाता कास्कीमा निर्वाचन केन्द्रित सुरक्षा योजना बनाई कार्यान्वयनको चरणमा गइसकेको बताइन् । निर्वाचनको समयमा कास्कीमा नेपाली सेना, नेपाल प्रहरी र सशस्त्र प्रहरी गरी १९ सय ७८ जना सुरक्षाकर्मीका साथमा निर्वाचन प्रहरीहरू परिचालन हुने जानकारी दिइन् । निर्वाचन प्रहरीको दरखास्त आह्वान मिति दुई दिन लम्ब्याइएको र हालसम्म १७ सय जनाको दरखास्त प्राप्त भइसकेको जानकारी दिइन् । मतदान केन्द्र लक्षित गरी नियमित चेकजाँचको व्यवस्था मिलाइएको पनि उनले उल्लेख गरिन् । राजनीतिक दलहरूसँग आवश्यक समन्वय भइरहेको र सवारी साधनलगायत स्रोत साधनको व्यवस्थापनमा पनि जुटिएको भन्दै उनले गत भदौ २४ मा कास्की कारागारबाट भागेका कैदीबन्दी फिर्ता ल्याउन विशेष रणनीति पनि तय गरिएको जनाइन् ।
प्रदेश निर्वाचन कार्यालय पोखराका निर्वाचन अधिकारी नारायण ढकालले निर्वाचन आयोगको कार्यतालिका अनुसार आज निर्वाचन अधिकृतको कार्यालय स्थापना गरिएको बताए । कार्यक्रमको सञ्चालन कास्की क्षेत्र नं. २ का सहायक निर्वाचन अधिकृत दीपक गिरीले सञ्चालन गरेका थिए ।
प्रत्यक्ष निर्वाचन प्रणालीतर्फको उम्मेदवारी मनोनयन दर्ता यही माघ ६ गते हुँदै छ । त्यसअअघि निर्वाचन सम्बन्धि कामलाई अघि बढाउन निर्वाचन अधिकृतको कार्यालय खोलेर कर्मचारी पनि पठाउने तयारी गरिएको हो । शुक्रबार कास्की सहित देशभरका सबै १६५ वटै निर्वाचन क्षेत्रमा अधिकृतको कार्यालय स्थापना गरिएको हो । आयोगले ७७ वटै जिल्लामा मुख्य निर्वाचन अधिकृतर ८८ जना निर्वाचन अधिकृतहरु तोकिसकेको छ । जिल्ला न्यायाधीशहरुबाट मुख्य निर्वाचन अधिकृत र न्याय सेवाका द्वितीय श्रेणीका अधिकृतलाई निर्वाचन अधिकृत तोकिएको छ ।
