पोखरा । जिल्ला समन्वय समिति कास्कीको आयोजनामा स्थानीय तह संस्थागत क्षमता स्व:मूल्याङ्कन र वित्तिय सुशासन जोखिम मूल्याङ्कनबारेमा स्थानीय तहहरूको अनुशिक्षण कार्यक्रम सोमबार सम्पन्न भएको छ।
कार्यक्रमको जिल्ला समन्वय समिति कास्कीका प्रमुख लिलाधर पौडेलले उद्घाटन गरेका थिए । पौडेलले स्व:मूल्याङ्कन र वित्तीय जोखिम मूल्याङ्कन पालिकाहरूको क्षमता मापनको महत्त्वपूर्ण औजार भएको हुँदा उत्कृष्ट नतिजाका लागि सबै प्रतिबद्ध हुनुपर्ने उल्लेख गरे । प्रमुख पौडेलले अनुशिक्षण मार्फत सबै पालिका हरू निरन्तर कार्यक्षमता बढाउन लाग्नुपर्ने बताए ।
कार्यक्रममा गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेले स्थानीय तह संस्थागत क्षमता स्व:मूल्याङ्कन र वित्तिय सुशासन जोखिम मूल्याङ्कन बारेमा सहजीकरण गरेका थिए ।
अनुशिक्षण कार्यक्रममा कास्कीका पालिकाहरूका प्रमुख सहित कार्यकारी अधिकृतहरू र विषयगत क्षेत्र हेर्ने फोकल पर्सन कर्मचारीहरूको सहभागिता रहेको थियो। कार्यक्रमको जिल्ला समन्वय समिति कास्कीका प्रमुख पौडेलको अध्यक्षतामा सम्पन्न कार्यक्रममा स्वागत जिल्ला समन्वय समिति कास्कीका सदस्य सीतादेवी विश्वकर्माले र सञ्चालन जिल्ला समन्वय अधिकारी नवराज बरालले गरेका थिए ।
