पोखरा। नेपाली नारीहरूको महान् पर्व हरितालिका तीज नजिकिँदै गर्दा बजारमा नयाँ-नयाँ तीजगीतहरू सार्वजनिक हुने क्रम तीव्र बनेको छ। यसै बीच नेपाली लोकसंस्कृतिको मर्मलाई जीवन्त राख्दै मौलिक लय र शब्दमा तयार पारिएको वरिष्ठ लोक गायिका हरिदेवी कोइरालाको नयाँ तीजगीत ‘चोलिया धुनी पानी मैले पाइन’ सार्वजनिक भएको छ।
गीतको शब्द/लय कोइरालाको हो भने आवाजमा उनलाई शान्ति गुरुङ, लक्ष्मी गिरी, बालुमाया पुनले समेत साथ दिएका छन् । डिजिटर स्टार र मालाश्री स्टुडियोमामा रेकर्ड गरेको गीतलाई तारानाथ आचार्यले एरेन्ज गरेका छन् ।
भिडियोसहित सार्वजनिक गरिएको यो गीतले परम्परागत तीजगीतको मर्मलाई कायम राख्दै आधुनिक समाजका यथार्थ र पारिवारिक कथालाई जीवन्त रूपमा प्रस्तुत गरेको छ। भिडियोको निर्देशन विनिता पौडेलले गरेकी हुन् भने पौडेल सहित अनमोल भण्डारीको अभिनय त्यहाँ हेर्न पाइन्छ ।
गीतमा कुलमाया र रोजी खत्रीको आकर्षक नृत्य हेर्न पाइन्छ । प्रदिप कुमार नापित र अंकित खैजुले छायाकंन गरेको भिडियो सम्पादन नापितले नै गरेका हुन् । फोटो निकोन पोखरामा पोष्ट प्रोडक्सनको काम गरिएको सम्पन्न भएको हो ।
‘चोलिया धुनी पानी मैले पाइन’ बोलको यो गीतमा जीवनका उकाली-ओराली, बुहारीले भोग्नुपरेका घरायसी दुःख, अनि तीजको बेला माइती सम्झेर पोखिएका भावनाहरूलाई मुख्य विषय बनाइएको छ। गीतको शीर्षकले नै विगतका दुःख-कष्ट र नेपाली समाजमा पानी तथा घरायसी कामको बोझसँग जोडिएका यथार्थलाई सङ्केत गर्दछ।
गीतमा पुराना मौलिक भाका र शब्द संयोजनको उत्कृष्ट प्रयोग गरिएको छ, जसले स्रोता तथा दर्शकलाई पुराना दिनको सम्झना गराउँछ। अझ आजभोलि तीजगीतका नाममा भित्रिएका विकृति र भद्दापनभन्दा टाढा रहेर कोइरालाको यो सिर्जनाले शुद्ध मौलिक लोकभाका पस्कने प्रयास गरेको छ।
गीतको दृश्य निर्माण र प्राविधिक पक्ष पनि उत्कृष्ट बनेको छ । भिडियोमा नेपाली मौलिक पहिरन (रातो साडी, पोते, र चोली) मा सजिएका कलाकारहरूको स्वाभाविक अभिनय र मौलिक नृत्य हेर्न पाइन्छ। ग्रामीण वातावरण, मौलिक घरआँगन र प्राकृतिक सौन्दर्यलाई भिडियोमा सुन्दर ढङ्गले कैद गरिएको छ, जसले गीतको मूल मर्मलाई अझ मजबुत बनाएको छ।
यसका अलावा गीतमा प्रयोग गरिएका मादल, बाँसुरी र सारङ्गीका धुनहरूले मौलिकताको पहिचान दिएका छन्। गायक तथा गायिकाको सुमधुर र भावुक स्वरले गीतलाई झनै जीवन्त बनाएको छ। गीतलाइ सुन्दर बनाउन व्यवस्थापकमा रहेर रामबहादुर कोइराला र कमल अर्यालले सघाएका छन् ।
तीज नजिकिँदै गर्दा मौलिक र सुन्न/हेर्न योग्य गीतहरूको खोजीमा रहेका नेपाली स्रोताका लागि ‘चोलिया धुनी पानी मैले पाइन’ एक उत्कृष्ट सांगीतिक कोसेली बनेको छ। हरिदेवी कोइराला युट्युब च्यानल मार्फत सार्वजनिक गरिएको यो गीतलाई दर्शक तथा स्रोताहरूले निकै रुचाउने अपेक्षा गरिएको छ।
त्यसोत २०४० सालमा ‘पाइन खबर’ बोलको गीत रेकर्ड गरी नेपाली साँगीतिक फाँटमा डेब्यु गरेकी गायिका कोइरालाले २०४२ सालदेखि निरन्तर तीजका एल्बम दर्शक श्रोतामाझ पस्किरहेकी छन् । उनका मनको वह, दुःखीको बिलौना, फेवाताल सलल, कास्कीको कोसेली, पाइन खबर–२, काठमाण्डौको कथा, फूल गोगनको, पिपल चौतारी, मुटुको धड्कन, ऐना हेरेर, लाली फूल, झिलझिल सितारा लगायतका असीभन्दा बढी एल्बम आइसकेका छन् । आफ्नै शब्द, लय र आवाजमा चारसय भन्दा बढी गीत उनले तयार पारिसकेकी छन् ।
भिडियो
मौलिक तीजगीत २०८३ चोलिया धुनी पानी मैले पाइन CHOLIA DHUNI PANI MAILE PAINA 4K VIDEO – YouTube
