तनहुँ । सगरमाथा बचत तथा ऋण सहकारी संस्था लिमिटेड, शुक्लागण्डकी–६, तनहुँले भोटेकोशी बाढीपीडितको सहयोगका लागि प्रधानमन्त्री दैवी प्रकोप उद्धार कोषमा २१ हजार रुपैयाँ सहयोग गरेको छ।
भोटेकोशी नदीमा आएको विनाशकारी बाढीका कारण प्रभावित परिवारको उद्धार, राहत तथा पुनःस्थापनामा सहयोग पुगोस् भन्ने उद्देश्यले संस्थाले उक्त रकम सहयोग गरेको हो।
सहकारी संस्थाका उपाध्यक्ष सन्तोष घिमिरेका अनुसार विपद्का समयमा पीडितको साथमा उभिनु सामाजिक उत्तरदायित्वअन्तर्गतको महत्वपूर्ण कार्य भएकाले संस्थाले राहत कोषमा सहयोग गर्ने निर्णय गरेको हो।
प्राकृतिक विपद्का कारण नागरिकले ठूलो क्षति व्यहोर्नुपरेको अवस्थामा राज्यको उद्धार तथा राहत अभियानमा सहयोग पुर्याउन विभिन्न संघसंस्था तथा समुदायबाट सहयोग जुटिरहेको छ। यसै क्रममा सगरमाथा बचत तथा ऋण सहकारीले पनि आफ्नो तर्फबाट सहयोग गर्दै बाढीपीडितको दुःखमा ऐक्यबद्धता जनाएको हो ।
सहकारी संस्थाहरू केवल बचत तथा ऋणको कारोबारमा सीमित नभई समुदायप्रतिको सामाजिक दायित्व निर्वाह गर्ने संस्थाका रूपमा समेत स्थापित हुँदै गएका छन्। विपद्का बेला पीडितलाई राहत उपलब्ध गराउनेदेखि सामाजिक तथा मानवीय सेवाका क्षेत्रमा सहकारीको भूमिका महत्वपूर्ण हुने गरेको छ।
संस्थाले विपद्मा परेका नागरिकप्रति सहानुभूति व्यक्त गर्दै सहयोग र सहकार्यको माध्यमबाट पीडितलाई राहत पुर्याउन सबै पक्षलाई आ–आफ्नो ठाउँबाट योगदान गर्न आग्रहसमेत गरेको छ।
