पोखरा । वरिष्ठ लोक दोहोरी गायक पुरुषोत्तम न्यौपानेको तेस्रो पटक एकल सांगीतिक साँझ हुँदैछ । यस अगाडि लायन्स क्लब अफ पोखरा सेन्ट्रल टाउनको आयोजनामा २०६६ सालमा पोखरामा र फेवा डिजिटल रेकर्डिङ स्टुडियोको आयोजनामा २०६८ सालमा काठमाण्डौमा एकल सांगीतिक प्रस्तुती राखेका उनको यसपालिको कार्यक्रम राष्ट्रिय लोक तथा दोहोरी गीत प्रतिष्ठान नेपालले आयोजना गरेको हो ।
चैत्र २२ गते शुक्रबार पोखरा सभागृह हलमा दिउँसो ३ बजेबाट सुरु हुने कार्यक्रमलाई भव्य बनाउन सम्पूर्ण तयारी पुरा भएको राष्ट्रिय लोक तथा दोहोरी गीत प्रतिष्ठान नेपालका अध्यक्ष रीता थापा मगरले जानकारी दिएकी छन् । प्रवेश निःशुल्क रहने कार्यक्रममा पुगेर गायक न्यौपानेका चर्चित गीत सुन्दै नाच्न अनि झुम्न पाइनेछ । दर्शकको सहभागितालाई ध्यान दिएर कार्यक्रम स्थल बाहिर दुई वटा एलइडी स्क्रिन मार्फत समेत कार्यक्रम हेर्ने व्यवस्था मिलाइएको आयोजकको भनाइ छ ।
कार्यक्रममा गायक न्यौपानेले बेलटारीमा फूलमै रानी, फूलको बासना, झिल झिल सितारा, ऐना हेरेर, त भनेर छोड्यो मायाले, ढुङ्गे धारामा, कुर्ता सुरुवाल, आज मुग्लिन झरौँ, पूर्वैमा झ्याल राखे गीत सुनाउँदै दर्शकलाई झुमाउँनेछन् ।
यसैगरी रुन्छ नि मन किन रुदैन, घाम जस्तो चम्किलो, देउरालीमा धजा, सररर पानी घट्टामा, मायाले मार्यो, म त हिडे पोखरा, मिर्मिमुनी काली थुनेकाे, कमल फूल र नरोऊ नरोऊ मैना गीत सुन्दै रम्न पाइनेछ । डाँडैमा पिपल सारेर गीत समेत गाउने उनको तयारी छ । कार्यक्रमको लागि वाद्यवादनको टोली काठमाण्डौबाट नै ल्याइएको छ ।
न्यौपानेलाई प्रस्तुती राख्ने क्रममा जुना श्रीस, सर्मिला गुरुङ, देवी घर्ती, पूर्णकला बिसी लगायतले समेत साथ दिनेछन् । कार्यक्रममा गीत सुन्ने मात्र नभएर गायक न्यौपानेका गीतमा नृत्य समेत हेर्न पाइनेछ । गायक न्यौपाने र गायिका कला लम्सालले आवाज भरेको राष्ट्रिय गीतमा नृत्य गर्दै सुरुवात हुने कार्यक्रममा प्रस्तुत गरिने नृत्यहरूलाई आकर्षक बनाउन राम लामाले संयोजन गर्नेछन् ।
न्यौपानेले आफ्ना बुबा सहित दोहोरी प्रतिष्ठानका हालसम्मका ८ जना अध्यक्षहरूलाई साक्षी राखेर आफ्नो प्रस्तुती राख्ने तयारी गरेका छन् । जसका कारण उनी यो कार्यक्रमलाई लिएर निकै उत्साहित छन् । सभागृह हलमा पुग्ने दर्शकले गायक न्यौपानेको बारेमा उनको जीवनीमा आधारित वृत्तचित्र हेरेर समेत जान्न पाउनेछन् ।
गायक न्यौपाने २०४६ सालमा रेडियो नेपालमा स्वर परीक्षा दिएका स्वर परीक्षामा उत्रिर्ण हुन सफल भएका थिए । त्यही वर्ष ‘बलाम देवी थान’ बोलको गीत रेकर्ड गरी नेपाली साँगीतिक फाँटमा औपचारिक रुपमा आगमन गरेका हुन् । उनले आवाज भरेको पहिलो एल्बम ‘श्रीखण्ड चन्दन’ हो । यो एल्बम २०४९ सालमा बजारमा आएको थियो । आफ्नै एल्बमको रुपमा श्रोतामाझ पस्केको पहिलो एल्बम भने ‘फुलको वासना’ थियो । जुन एल्बम २०५३ सालमा म्युजिक नेपालले बजारमा ल्याएको थियो ।
राष्ट्रिय लोक तथा दोहोरी गीत प्रतिष्ठान नेपालका पूर्व केन्द्रीय अध्यक्ष समेत रहेका न्यौपाने हाल कार्यक्रम अधिकृतको रुपमा रेडियो नेपाल प्रादेशिक प्रसारण कार्यालय पोखरामा कार्यरत छन् ।
प्रतिष्ठान नेपालले नारायण रायमाझीको सांगीतिक साँझ सफलतापूर्वक सम्पन्न गरिसकेको छ । हरेक वर्ष एकजना अग्रज स्रष्टाको सांगीतिक साँझ आयोजना गर्ने प्रतिष्ठानले योजना बनाएको अध्यक्ष थापा मगरले खुलाइन् ।
२०५८ सालमा स्थापना भएको राष्ट्रिय लोक तथा दोहोरीगीत प्रतिष्ठान नेपाल लोकगीत, सङ्गीत र लोककलाको क्षेत्रमा क्रियाशील रहदै आएको छ । प्रतिष्ठानले प्रदेश समिति, उपत्यका समन्वय समिति, जिल्ला समिति तथा विदेशमा समेत शाखा समिति मार्फत आफ्ना गतिविधि गर्दै आइरहेको छ ।
पत्रकार सम्मेलनमा प्रतिष्ठानका सांगठनिक उपाध्यक्ष सुवास केसी र उपमहासचिव शिरिष देवकोटाले पनि कार्यक्रमको तयारिको बारेमा बोलेका थिए । सांगीतिक साँझमा २५ लाख आम्दानी र २० लाख खर्च हुने आयोजकको अनुमान छ । सांगीतिक साँझलाई मुख्य प्रायोजकको रुपमा एनसेलले साथ दिएको छ ।
