पोखरा । पोखरामा बैशाख तेश्रो साता अन्तर्राष्ट्रिय लायन्स कप पुरुष भलिबल प्रतियोगिता हुने भएको छ । लायन्स क्लब इन्टरनेसनल डिस्ट्रिक्ट ३२५ एम नेपालको आयोजनामा लायन्स भलिबल प्रतियोगिता हुने भएको छ । आयोजकले विहीबार पोखरामा पत्रकार सम्मेलन गरेर जानकारी अनुसार प्रतियोगिता पोखरा रङ्गशालास्थित मल्टिपर्पोज हलमा बैशाख १८ गतेदेखि २२ गतेसम्म सञ्चालन हुनेछ ।
लायन्स क्लबले इतिहासमै पहिलो पटक प्रतियोगिता आयोजना गर्न लागेको दावी गरिएको छ । यो प्रतियोगितामा ६ टिम सहभागी हुने क्लबका डिस्ट्रिक्ट गभर्नर चण्डीप्रसाद अर्यालले जानकारी दिए । जस अनुसार प्रतियोगितामा पाकिस्तान भलिबल क्लब इस्लामबाद, नेपाल पुलिस क्लब, गण्डकी प्रदेश भलिबल सङ्घ, नेपाली सेनाको त्रिभुवन आर्मी क्लब र सशस्त्र प्रहरीको एपीएफ क्लब सहभागी हुनेछन् । थप एक टिमको टुङ्गो लाग्न भने बाँकी छ । भारत र इरानका टिमहरूसँग सहभागिताका लागि छलफल भइरहेको भन्दै उनले यी दुई टिममध्ये कुनै एक टिम सहभागी हुने उनको भनाई छ । यदि यी दुवै टिम सहभागी नभएमा हेल्प नेपाल सहभागी बन्न सक्ने उनले जनाए ।
नेपालको राष्ट्रिय खेल भलिबललाई राष्ट्रिय तथा अन्तर्राष्ट्रिय स्तरमा प्रवर्द्धन गर्नका लागि आफू गभर्नर हुँदा गरेको वाचा अनुसार प्रतियोगिता गर्न लागेको अर्यालले बताए । राष्ट्रिय खेलकुद परिषदबाट प्रतियोगिताको लागि स्वीकृत पाउन ६ महिना लागेको बताएका उनले हरेक वर्ष प्रतियोगिता गर्ने लक्ष्यका साथ अगाडि बढ्ने उल्लेख गरे । प्रतियोगितामार्फत भलिबलका युवा खेलाडीहरूलाई अन्तर्राष्ट्रिय प्रतिस्पर्धाको अवसर प्राप्त हुने आयोजकको विश्वास छ । प्रतियोगिताले पोखरालाई खेल पर्यटनको हबका रुपमा विकास गर्न सघाउने आयोजकको विश्वास रहेको छ ।
प्रतियोगिताको विजेता टिमले ४ लाख ४४ हजार ४ सय ४४ रुपैयाँ ट्रफी, मेडल तथा प्रमाणपत्र प्राप्त गर्ने तथा उपविजेताले २ लाख ४४ हजार ४ सय ४४ रुपैयाँसहित ट्रफी, मेडल र प्रमाणपत्र प्राप्त गर्ने क्लबका क्याबिनेट सेक्रेटरी शिवराज आचार्यले जानकारी दिए । त्यस्तै प्रतियोगितामा तेस्रो हुने टिमले १ लाख ४४ हजार ४ सय ४४ रुपैयाँसहित ट्रफी, मेडल तथा प्रमाणपत्र प्राप्त गर्ने उनले बताए ।
प्रतियोगितामा सर्वोत्कृष्ट खेलाडीलाई नगद १४ हजार ४ सय ४४ रुपैयाँसहित मेडल र प्रमाणपत्र तथा अन्य विधागत तर्फका उत्कृष्ट खेलाडीहरूलाई जनही ८ हजार ४ सय ४४ रुपैयाँसहित ट्रफी, मेडल र प्रमाणपत्र प्रदान गरिने छ । प्रतियोगिता सञ्चालन गर्न ८० लाख खर्च हुने अनुमान गरिएको छ ।
राष्ट्रिय खेलकुद परिषद, नेपाल भलिबल सङ्घ र प्रदेश खेलकुद परिषद गण्डकीको स्वीकृति तथा गण्डकी प्रदेश भलिबल सङ्घको प्राविधिक सहयोग, पोखरा महानगरपालिकाको प्रवर्द्धन र गण्डकी प्रदेश सरकारको विशेष सहयोगमा प्रतियोगिता हुन लागेको हो ।
नेपाल पर्यटन बोर्ड, प्रदेश खेलकुद परिषद् गण्डकी, पोखरा पर्यटन परिषद, कास्की जिल्ला खेलकुद विकास समिति, कास्की जिल्ला भलिबल सङ्घ, टाइगर ग्रुप अफ पोखरा नेपाल लगायतका संस्थाहरू सहयोगीको रुपम रहेका छन् । खेल हेर्नको लागि न्यूनतम प्रवेश शुल्क ३ सय रुपैयाँ लाग्नेछ । खेल हेर्नका लागि देश तथा विदेशका लायन्सका लिडरहरु पोखरामा आउने र यहाँका गतिविधि विश्वका २ सय भन्दा बढी राष्ट्रमा फैलाउने आयोजकको दावी छ । पत्रकार सम्मेलनमा लायन्स क्लब इन्टरनेसनल डिस्ट्रिक्ट ३२५ एम नेपालका वर्ष २०२५/२६ का इलेक्ट डिस्ट्रिक्ट गभर्नर धनिराम बरालले पनि बोलेका थिए ।
