पोखरा । पोखराको फेवाताल किनारमा फागु पूर्णिमा होलीको दिन गत वर्षजस्तै यस वर्ष पनि बृहत् होली विशेष कार्यक्रम ‘होलिल्याण्ड’ हुने भएको छ । प्रचार नेपाल र स्पेक्स फोर्टिनको आयोजनामा बाराहीघाट चौरमा फागुन २९ गते बिहीबार ‘होलिल्याण्ड’ कार्यक्रम हुने भएको हो ।होलिल्याण्डको दोस्रो संस्करणमा पनि प्रवेश नि:शुल्क रहेको प्रचार नेपालका सञ्चालक आशिष पुरीले जानकारी दिए ।
कार्यक्रममा डिजे डेनी, डिजे अनिष, डिजे रुस, डिजे एम्मी, डिजे न्याक्सिजम, डिजे साउडेको प्रस्तुति रहने उनले बताए । उक्त कार्यक्रमको स्टेज हाइपरमा बकबक (विवेक गुरुङ) रहेका छन् । स्टेज हाइपर भनेको डिजेले प्रस्तुति दिँदा माहोल बनाउने व्यक्ति हुन् ।
कार्यक्रममा हट एयर बेलुन, अल्ट्रालाइट, ड्रोन स्प्लयास, खानाको स्टल र साङ्गीतिक प्रस्तुति आकर्षणको रुपमा रहने स्पेक्स फोर्टिनका सञ्चालक महेश्वरसिंह भण्डारीले जानकारी दिए ।
साथै होलीको मज्जा दिन पानी ट्याङ्करबाट रङ्ग भरिएको पानी सहभागीलाई फाल्ने तयारी पनि रहेको आयोजकको भनाइ छ ।बिहान ११ बजेदेखि ६ बजेसम्म हुने कार्यक्रमको सञ्चालक एकिन गुरुङ छन् । यो कार्यक्रमलाई टिल्ट योर वर्ल्ड र एक्स्पर्ट एजुकेसन एन्ड भिसाले सहयोग गरेको छ ।
प्रचार नेपालले पोखरामा प्रायः साङ्गीतिक कार्यक्रम गर्दै आएको छ । यो वर्षको प्रणय दिवस (भ्यालेन्टाइन डे)मा द एज ब्यान्ड र स्वरको कन्सर्ट गरेको थियो जहाँ करिब ५ हजार दर्शक उपस्थित थिए । त्यसअघि गत कार्तिकमा चर्चित गायक सज्जनराज वैद्यको कन्सर्टको व्यवस्थापन प्रचार नेपालले नै गरेको थियो । अङ्ग्रेजी नयाँ वर्षको अवसरमा यो वर्ष आयोजित २६ औं सडक महोत्सवमा प्रचारले गत पुसमा ‘द एण्ड गेम’ नाम दिएर सविन राई एण्ड फेरोह, पूर्ण राई र दाजु–भाइहरू, र्यापर डोंग, देवेन्द्र बब्लु एण्ड द फिरन्तेलगायतको कन्सर्ट गरेका थिए ।
