पोखरा । पोखरामा यही मंसिर १३ गते छैटौँ योःमरी महोत्सव हुने भएको छ । पोखरा महानगरपालिका वडा नं। ४ को आयोजना र नेवा मिसा पुचः कास्कीको आह्वान र पोखरा ४ मा रहेको मिसा पुचःहरूको सहकार्यमा महोत्सव हुन लागेको हो ।
आयोजक पोखरा महानगरपालिका वडा नं। ४ ले बुधबार पत्रकार सम्मेलन गरेर महोत्सवको तयारी अन्तिम चरणमा पुगेको जानकारी दिएको छ । कला संस्कृतिको संरक्षण एवं आन्तरिक पर्यटनको प्रबर्द्धन गर्ने उद्देश्यले महोत्सव आयोजना गर्न लागिएको पोखरा ४ का वडाअध्यक्ष देवकृष्ण पराजुलीले जानकारी दिए । गणेशटोलस्थित गणेशमन्दिर परिसरमा हुने महोत्सवमा योःमरी प्रतियोगितासँगै लक्ष्य ब्याण्डको लाइभ कन्सर्ट र विद्यार्थीहरूको नृत्य प्रतियोगिता हुने छ ।
शनिबार बिहान ११ बजेबाट सुरु हुने छ । त्यसअघि पोखरा ४ पुरानो वडाकार्यालयबाट झाँकी र्याली निकालिने छ । उक्त र्याली पालिखेचोक, महेन्द्रपुल, चिप्लेढुङ्गा, सिद्धार्थचोक, रामकृष्ण टोल हुँदै पुनः महोत्सवस्थलमा आएर समापन हुने छ ।
योःमरी प्रतियोगताका लागि हालसम्म २१ समुहले नाम दर्ता गराइसकेको अध्यक्ष पराजुलीले जानकारी दिए । प्रतियोगितामा प्रथम हुने समुहले नगद रु १५ हजार, द्वित्तीय हुने समुहले नगद रु १० हजार, तृतीय हुने समुहले नगद रु ५ हजारका साथमा प्रमाणपत्र प्राप्त गर्ने छन् । यस्तै सान्त्वना हुने समुहलाई नगद रु ३ हजार र प्रमाणपत्र प्रदान गरिने उनले बताए ।
प्रतियोगितामा सहभागी सबै समूहलाई नगद रु १५ सय प्रदान गरिने छ । प्रभातफेरी कार्यक्रममा सहभागी हुनेमध्ये प्रथम द्वितीय र तृतीय हुने आमा समुह, टोल विकास संस्थालाई क्रमशः नगद रु ७ हजार, ५ हजार र ३ हजारसहित प्रमाणपत्र प्रदान गरिने छ ।
पत्रकार सम्मेलनमा बोल्दै नेवाः खलः कास्कीका अध्यक्ष अशोक पालिखेले योःमरी महोत्सवले संस्कृति संरक्षणसँगै महिलाहरुलाई व्यावसायिक बनाउन सहयोग गरेको बताए । महोत्सवलाई आगामी वर्षहरूमा पनि थप व्यवस्थित बनाएर निरन्तरता दिदै लैजाने उनको भनाई छ । महोत्सवकै कारण योःमरीको माग समेत बढ्दै गएको पालिखेले बताए ।
विशेषगरी जाडो महिनामा योःमरी खाइन्छ । नेपाल भाषामा योः मरीको अर्थ मिठो रोटी भन्ने हुन्छ । नेवा मिसाः पुचः कास्कीकी अध्यक्ष सङ्गीता बज्राचार्यले योःमरी चामलको पिठोमा तील, चाकु, मास राखेर बनाउने प्रचलन भएपनि अहिले आवश्यकताअनुसार खुवा, चकलेट, मासुलगायत सामाग्री राखेर समेत योःमरी बनाउन थालिएको बताइन् ।
योःमरीको सांस्कृतिक धार्मिक तथा वैज्ञानिक महत्व रहेको छ । पोखरा ४ मा गतवर्ष पनि योःमरी महोत्सव भएको थियो ।
