पोखरा । जिल्ला प्रशासन कार्यालय कास्कीले भारी वर्षाको समयमा गाडी नचलाउन आग्रह गरेको छ। जल तथा मौसम विज्ञान विभागले असोज १७ देखि २० गतेसम्म गण्डकी प्रदेशमा मध्यमदेखि भारी वर्षा हुने पूर्वानुमान गरेसँगै यस्तो आग्रह गरेको हो । कास्कीका संवेदनशील मानिएका सडक खण्डमा सवारी सञ्चालनका लागि विशेष समय तालिका समेत लागू गरिएको छ।
कास्कीका सहायक प्रमुख जिल्ला अधिकारीले बिहीबार जारी गरेको विज्ञप्तिअनुसार बिरेठाँटी–घान्द्रुक, बिरेठाँटी–उल्लेरी, लुम्ले–लान्द्रुक र काहुँखोला–सिक्लेस मार्गका सवारी साधनलाई असोज १७ देखि दिउँसो ४ बजेसम्म प्रस्थान गर्ने र असोज १८ देखि बिहान ५ बजेपछि मात्र सञ्चालन हुने व्यवस्था गरिएको छ।
तर, भारी वर्षा भएमा सो सडक खण्डमा कुनै पनि सवारी साधन नचलाउन विज्ञप्तिमा स्पष्ट गरिएको छ। प्रशासनले यातायात व्यवसायीलाई क्षमताभन्दा बढी यात्रु नचढाउन, सावधानीपूर्वक सवारी सञ्चालन गर्न र जोखिम बढेमा तत्काल रोक लगाउन पनि निर्देशन दिएको छ।
त्यसैगरी सिद्धार्थ राजमार्ग, भूपि शेरचन राजमार्ग पोखरा–बाग्लुङ, मुग्लिन–पोखरा सडकखण्ड, वेगनास–भोर्लेटार सडकखण्ड लगायत जोखिमयुक्त क्षेत्रमा तत्काल परिचालन हुनेगरी डोजर, एक्साभेटर, लोडर लगायतका हेभी इक्युपमेन्ट तयारी अवस्थामा राख्न सम्बन्धित कार्यालय तथा निजी क्षेत्रलाई आदेश दिइएको छ।
प्रशासनले बाढी, पहिरो र डुबानको जोखिम रहेका नदी किनार र भीरालु क्षेत्रमा बसोबास गर्ने वासिन्दालाई सुरक्षित स्थानमा सर्न, आपतकालीन अवस्थामा प्रयोग हुने सामग्रीसहितको ‘झटपट झोला’ तयार राख्न र कुनै विपद् घटना भएमा तुरुन्त प्रहरी, स्थानीय तह वा प्रशासनलाई जानकारी दिन आग्रह गरेको छ।
उच्च हिमाली क्षेत्रमा हिमपातको समेत सम्भावना भएकाले अन्नपूर्ण, मर्दि हिमाल लगायतका पदयात्रा मार्गमा तत्काल ननिस्किन सन्देश दिइएको छ। साथै, असोज १७ देखि २० गतेसम्म अत्यावश्यक कामबाहेक यात्रामा ननिस्कन सर्वसाधारणलाई अनुरोध गरिएको छ।
वरिष्ठ मौसमविद् मीनकुमार अर्यालले शनिबार र आइतबार बढी वर्षा हुने जानकारी दिँदै सोमबारबाट भने क्रमशः सुधार हँदै जाने बताएका छन्। यस वर्षको मनसुन जेठ १५ गते देशको पूर्वी भागबाट प्रवेश गरी कोशी प्रदेशका अधिकांश भूभागमा बिस्तार भएकामा जेठ २९ गते मधेस, बागमती र गण्डकी प्रदेशका केही भाग र लुम्बिनी प्रदेशका पूर्वी क्षेत्रका केही भागसम्म फैलिएको थियो । असार ६ देखि भने देशभर फैलिएको थियो।
