पोखरा । कास्कीको लेखनाथमा जारी दोस्रो सूर्य तारा खेल महोत्सव अन्तर्गत नेकोस कप फुटबल प्रतियोगितामा विष्णु पादुका क्लब हेम्जा र एल सी ब्रदर्श युनाइटेड सेमिफाइनलमा प्रवेश गरेका छन् ।
मङ्गलबारका विष्णुपादुका क्लब हेम्जा र आरएस बिचको पहिलो खेलमा विष्णु पादुका २–१ गोल अन्तरले विजेता बन्दै सेमिफाइनलमा प्रवेश गर्न सफल भएको सूर्य तारा क्लबका अध्यक्ष तथा खेल महोत्सवका संयोजक विष्णु पुनले जानकारी दिए । मङ्गलबारको एलसी ब्रदर्श र गण्डकी प्रदेश प्रहरी क्लबबीचको दोस्रो खेल निर्धारित समयमा बराबरी भएपछि ट्राइबेकरमा धकेलिएको थियो । ट्राइबेकरमा डिफेन्डिङ च्याम्पियन एल सी ब्रदर्श युनाइटेडका गोलकिपर सन्दिप क्षेत्री नायक भन्दा खेल एल सी ब्रदर्शको पक्षमा गएको थियो । उनले गण्डकी प्रदेश प्रहरी क्लबका दुई पेनाल्टी प्रहार रोकेका थिए ।
अब बुधबार पहिलो सेमिफाइनल खेल आयोजक सूर्य तारा क्लब र विष्णु पादुका क्लब हेम्जाबीच हुने अध्यक्ष पुनले जानकारी दिए । यो खेल दिउँसो १ बजे सुरु हुनेछ । सूर्य ताराले कृष्णदल गणलाई पराजित गरेर सेमीफाइनलमा पुगेको हो । विष्णु पादुकाले भने पहिलो खेलमा अन्नपूर्ण गाउँपालिका र दोस्रो खेलमा ट्राइबेकर मार्फत ४–२ ले आरएस बिचलाई पराजित गर्दै सेमिफाइनलको यात्रा तय गरेको हो ।
फूटबल प्रतियोगितामा प्रथम हुनेले ४ लाख ४ हजार ४ सय ४४ रुपैयाँ सहित सिल्ड मेडल र प्रमाणपत्र हात पार्ने अध्यक्ष पुनले बताए । द्वितीय हुने टोलीले २ लाख २ हजार २ सय २२ रुपैयाँ सहित सिल्ड मेडल र प्रमाणपत्र पाउनेछ । वेस्ट प्लेयरलाई १५ हजार र सर्वाधिक गोलकर्ताले १० हजार रुपैयाँ सहित ट्रफी मेडल र प्रमाणपत्र हात पार्ने अध्यक्ष पुनले जनाए । फुटबल प्रतियोगितामा १० टिमको सहभागिता रहेको छ ।
चैत्र २ गते सम्म हुने खेल महोत्सवमा फुटबलका अलावा खुला सामूहिक लोक नृत्य प्रतियोगिता, खुला महिला स्लो स्कुटर रेस प्रतियोगिता, राष्ट्रिय खुला महिला डोरीतान प्रतियोगिता, खुला टेबलटेनिस प्रतियोगिता, एथ्लेटिक्स प्रतियोगिता र जातीय सङ्घसंस्था स्तरीय झाँकी प्रदर्शनी प्रतियोगिता समेत समावेश रहेको नेपाल खेलकुद महासङ्घ कास्कीका अध्यक्ष ईश्वर अधिकारीले जानकारी दिए ।
प्रतियोगिताको मुख्य प्रायोजकमा कर्माचार्य बेक्स एण्ड फुड्स प्रालि र सह प्रायोजकमा बन्दिपुर केबल कार प्रालि रहेका छन् । प्रवर्द्धकको रुपमा पोखरा महानगरपालिका, गण्डकी प्रज्ञा प्रतिष्ठान, राष्ट्रिय खेलकुद परिषद नेपाल, प्रदेश खेलकुद परिषद गण्डकी र नेपाल पर्यटन बोर्ड रहेको जनपरिचालन उपसमिति संयोजक समेत रहेका महासंघ कास्की अध्यक्ष अधिकारीले बताए । सूर्य तारा क्लब र नेपाल खेलकुद महासङ्घको संयुक्त आयोजनामा पोखरा २९ स्थित प्रस्तावित लेखनाथ रङ्गशालामा यो खेल महोत्सव भैरहेको छ ।
