पोखरा । पोखरा उद्योग वाणिज्य सङ्घका ३५ औं महाधिवेशनको मिति नजिकिएसँगै नयाँ नेतृत्वका लागि अर्जुन पोखरेल नेतृत्वको प्यानल घरदैलो अभियानमा छन् । पोखरा उद्योग वाणिज्य सङ्घको ३४ औं महाधिवेशनमा अध्यक्षका प्रत्यासी समेत रहेका पोखरेल वर्तमान कार्यसमितिका केही पदाधिकारी र सदस्यसहित महाधिवेशनको तयारीमा छन् । यसैबीच प्रस्तुत छ, ३५ औं महाधिवेशनको अध्यक्ष पदका उम्मेदवार अर्जुन पोखरेलसँग चुनावसँगै समसामयिक विषयमा गरिएको कुराकानीको सम्पादित अंश ।
पोखरा उद्योग वाणिज्य सङ्घको ३५ औं महाधिवेशनमा नेतृत्वका लागि अध्यक्षको उम्मेदवार हुनुहुन्छ, तपाईँको प्यानलमा रहेका ५ जना पदाधिकारी निर्विरोध हुँदा उपमहासचिव र तपाई घेराबन्दीमा परेको होकी, वातावरण सहज बन्दै गएको हो ?
वातावरण सहज बन्दै गएको हो, नेतृत्वको पहिलो कार्यकुशलता भनेको आफ्ना टिममा रहेका साथीहरूलाई सेफ ल्यान्डिङ गराउने पनि हो । पोखरा उद्योग वाणिज्य सङ्घको निर्वाचनमा होमिइरहँदा यो अलि ठुलो र गर्विलो संस्था हा । त्यहाँ धेरै चाहिँ कम्पोनेनहरूलाई हेर्नुपर्ने हुन्छ, त्यो गर्दा एउटा टिमको आवश्यकता पर्दछ । विगतमा पनि टिम नै बनेर निर्वाचनमा हामी होमिएका थियौँ । लामो समय पनि पोखरा उद्योग वाणिज्य सङ्घमा विभिन्न पदमा रहेर काम गरेको र निर्वाचनमा होमिएको हुनाले टिम चाँहि आवश्यक पर्छ र टिमका साथीहरूलाई सेफ ल्यान्डिङ गराएर आफू बलियो हुनुपर्छ भन्ने मेरो मान्यता हो । आफ्नो टिममा भएको साथीहरूलाई अरु प्रतिस्पर्धीहरूले निर्विरोध त बनाउँदैनन् । त्यो चाहिँ ग्लोबली इलेक्सनमा त्यस्तो हुँदैन ।
तपाइसँगै अध्यक्ष पदमा गोकर्ण कार्कीको पनि उम्मेदवारी परेको छ, उहाँको टिममा रहेका साथीहरूलाई घेराबन्दीमा पारेर आफ्नो टिममा ल्याउनु भयो नि, तपाईँको टिममा आएपछि काउन्टर स्टाटेजी भए जस्तो लाग्दैन ?
म ३४ औं महाधिवेशनमा प्रतिस्पर्धा गर्ने मेरो बाध्यता थियो । त्यो बेला म एक्लै चुनाव लडे यो हिसाबले मसँग टिम त थियो तर त्यो बेला कमजोर थियो । त्यसैले म पराजित भए, त्यो बेलामा मेरो चुनाव लड्नुपर्ने परिस्थिति थियो । अब यहाँ के भाष्य बनाइएको छ भने, उहाँको टिममा हुनुहुन्छ भन्ने जुन खालका कुरा साथीहरूले कुरा गर्नुभएको छ । त्यो रियालिटीमा होइन, चुनावमा (स्टाटेजी) रणनीति हुन्छ । २ वर्ष अगाडि ति साथीहरू जुन अहिले मेरो पदाधिकारी कार्यसमितिका साथीहरू थिए सबै मसँग काम गरेका थिए । २ वर्ष मात्र म बाहिरिएको हुँ । त्यो भन्दा अगाडि मेरो इतिहास हेर्नुभयो भने, मेरो प्रतिस्पर्धी बन्नुभएको प्राय एक्लै एक्लै चुनाव लडेर आउनु भएको हो । त्यसैले गर्दा के हो भने, पहिरो उथलपुथल भन्ने कुरा केही पनि छैन । नेतृत्व भनेको सबैलाई समन्वय गर्ने हो, मेरो एउटा एजेण्डा छ, समन्वय गर्ने, प्राइभेट सेक्टरको एडभोकेसी गर्ने भन्ने नै छ । त्यसैले गर्दा चुनावमा कमजोर बनाउन शङ्काहरू फाल्ने हो, मैले स्पष्ट रुपमा भन्नुपर्छ २ वर्ष अगाडि बाहिरी सकेका थिए तर मैले संस्थाको हितको लागि राम्रै काम गरेको छु ।
पोखरा उद्योग वाणिज्य सङ्घको इतिहास हेर्ने हो भने अध्यक्षमा पराजित जो कोही पलायन भएको देख्छौं, तपाई चाँहि के कति कारण वा परिस्थितिले आउने वातावरण बन्यो ?
मैले पनि सङ्घमा यत्रो वर्ष काम गरे यहाँको नेतृत्वमा पुगेन भने मेरो दुःख त्यो एफोर्ड, एफेसेन्सी सबै खेर जाने भयो । बाहिरी सकेपछि कार्यक्रमहरुमा सबैसँग समन्वय गर्न गाह्रो हुन्छ । म साधारण सदस्यमा भए । निवर्तमान उपाध्यक्ष भएको कारण उपस्थित हुने बाहेक अरु भूमिका रहने भएन, तर जुन पदाधिकारी भएका साथीहरू छन् सबै २ वर्ष अगाडि मसँगै भएका साथीहरू हुन् । उहाँहरुसँग मेरो सम्बन्ध थियो कुराहरु गरिराखेको थिए, बिचमा उहाँको उता पनि एटेचमेन्ट भयो जोसँगै काम गर्नु भएको छ उता पनि जोडिनुभयो । त्यहाँ पनि एक खालको समिकरण बन्न सक्ने सम्भावना रहन्छ, एक चोटि टिम कमजोर भएर हारिसकेको मान्छेले फेरी पनि त्यो खालको नियती भोग्ने पक्षमा थिइन । त्यसैले गर्दा ति साथीहरूलाई आउँदिन भन्ने होइन । मैले सुष्म रुपमा हेरी राखेको थिए । साथीहरुसँग कुरा गरिराखेको थिए । उही दिन सेकेण्डमा यो टिम बनेको होइन । बिस्तारै सबैसँग कुराहरु गर्दै जसले पनि संस्थापन भन्ने चलन छ, उहाँहरु मिलेर गएको भए मेरो नियति त २ वर्ष बाहिर भएको मान्छे को त्यही हुन्थ्यो, एकचोटी घाइते भइसकेपछि विना तयारी हामी जतिको युवा त्यसरी चाँहि अगाडि बढिदैन भन्ने हो, यी साथीहरू मसँग थिए । दुई वर्ष अगाडि र १० वर्षदेखि सँगै हुनुहुन्छ । मैले कसैको चोरेको ल्याएको पनि होइन । ३४ औं महाधिवेशनमा पनि व्यवसायी उद्योगीहरुले मलाई राम्रो मत दिनुभएको थियो । पोखरा उद्योग वाणिज्य संघले पोखरामा केही गरिदिए हुन्थ्यो भन्ने छ त्यसैले पोखराका व्यवसायीहरुले विवेक प्रयोग गरेर नै मतदान गर्नुहुन्छ भन्ने लागेको छ ।
पोखराको शैक्षिकदेखि पूर्वाधार विकासमा सङ्घको योगदान महत्वपूर्ण छ, पछिल्लो समय अन्य संस्थाहरु चलायनमान हुन सकेको छैन, यसो हेर्दा पोखरा उद्योग वाािणज्य सङ्घको अध्यक्ष भन्ने जुन थियो पछिल्लो समय त्यो छैन यस्तो अवस्थामा तपाईलाई सङ्घको अध्यक्षको मोह नै किन ?
सङ्घको जुन छवि छ त्यो छवि मैले फिर्ता लिन छ । हामीले भुइँ टाइपको एजेण्डा लिएका छौं । पोखरा अन्तर्राष्ट्रिय शहर भइसक्यो । तथापि हामीले गर्नुपर्ने समन्वय हो । संघ संस्था छन् खुल्छन् । पोखरा उद्योग वाणिज्य संघ व्यवसायसँगसँगै सामाजिक काममा महत्वपूर्ण भुमिका भएको संस्था हो । हरेक चिजको अध्ययनसँगै आफैले हेर्ने मौका पनि पाए । पोखराको विकासको कुरा हेर्दा एयरपोर्टदेखि लिएर विश्वविद्यालय बनाउन हामीले समन्वय गर्ने, निर्णायक कतै पनि होइनौ, छलफलको केन्द्रबिन्दु चाँहि पोखरा उद्योग वाणिज्य संघ रहेछ । यहाँ छलफल भएर निस्केपछि बल्ल बाहिर जाने रहेछ । चाहे त्यो पिएन क्याम्पस, फेवाताल होस् सबै पक्षमा यस संस्थाको योगदान छ, त्यसैले नै यस संस्थाको गरिमा रहेको हो ।
यस संस्थाको छविलाई कसरी माथि उठाउनुहुन्छ ?
सबैसँग समन्वय गर्दै लिडरसीपको क्षमता म राख्छु । मेरो टिमको चाँहि साथीहरू हुनुहुन्छ, अरु साथीहरू पनि हुनुहुन्छ सबैको सल्लाह सुझावहरु लिनुपर्छ र बीचमा उद्योग वाणिज्य सङ्घमा साथीहरुको ग्याप भयो भन्ने कुरा छ, बीचमा चार पाँच वटा व्यवसायीक रुपमा रहेका पर्यटन, कृषि, सबै क्षेत्रलाई समेटेर सेकेण्ड लेयरको कमिटी बनाएर अगाडि बढियो भने, सबैलाई समेट्न सकिन्छ उहाँहरुले हामीलाई गाइड गरेजस्तो पनि हुन्छ समन्वय पनि भएर जान्छ ।
बजारमा सटर बन्द हुँदैछन्, व्यवसायीहरुको प्रश्न छ, सङ्घमा बसेर तपाई उहाँहरुको पक्षमा के गर्नुहुन्छ ?
एप्रोचसहितको एडभोकेसी गर्ने हो, हामी निर्णायक होइनौं । जति पनि गर्न पर्ने होलान तीन तहका सरकार छन् । करदेखि लिएर प्रशासनसम्मका कुराहरु होलान् । तिनीहरुसँग एप्रोचसहितको एडभोकेसी गर्ने हो । सुरुवात हामी गर्ने हो । म उद्योग वाणिज्य सङ्घमा लामो समय बसे । अठ्यारो पर्दा हामीले के गथ्यौ भने त्यहाँ, महासंघले कहिले बोल्ला भनेर पर्खेर बस्ने, मैले के भन्थे भने, महासचिव भैसकेको मान्छे, त्यस्तो होइन सुरुवात हामीले गर्नुपर्छ । सरकारको प्रतिपक्ष नीजि क्षेत्रपनि हो । सरकारको आलोचना त नीजि क्षेत्रले पनि गर्नुपर्छ । हामीले सुझाव त दिनुपर्यो, त्यो सुझावलाई तीन तहका सरकारले आलोचनाको रुपमा ग्रहण गर्ने कि नगर्ने, हामीले आवाज एकदमै बुलन्द गर्छौ । व्यवसायीका समस्याहरुलाई समाधानतर्फ लैजान्छौं, केही कामहरु म महासचिव हुँदा पनि गरेका छौं, संस्थाको इथिक्समा रहेर काम गरिरहेका छौं । पोखरा उद्योग वाणिज्य सङ्घमा पूर्व अध्यक्षहरुको पनि चिन्ता छ । संस्था चलायन हुन सकेन, गलत भाष्य निर्माण हुँदै गयो भनेर चिन्तामा हुनुहुन्छ । त्यो चिन्तालाई आशामा बदल्न हामी टिमसहित आएका छौं काम गरेर देखाउँछौं ।
कुरा गरिरहँदा तपाईले पूर्व अध्यक्षहरुको आर्शिवाद मलाई छ भन्ने आशय राख्नुभयो तपाईलाई नै पूर्वअध्यक्षहरुले समर्थन छ त ?
मलाई पूर्वअध्यक्षहरुको आर्शिवाद होइन चिन्ता छ । चुनावमा प्रतिस्पर्धा गरिरहँदा शंका उपशंका उब्जा गर्ने कुराहरु रहन्छ । म बाहिरी सकेको मान्छे आएको हुनाले बिना तयारी आएको छैन । व्यवसायीहरुको विना आग्रह टिममा भएका साथीहरुको विना सपोत र अग्रजहरुको विना सद्भाव आएको छैन भन्ने त आम व्यवसायीहरुले बुझ्नुभएको छ ।
तपाईहरुको प्रतिवद्धता हेर्दा पोखरा अन्तर्राष्ट्रिय विमानस्थल सञ्चालन गर्न पहलकदमी गर्छौ भन्नुभएको छ सरकारले सकेको छैन तपाईहरुले कसरी सक्नुहुन्छ ?
अन्तर्राष्ट्रिय विमानस्थल कसलाई चाहिएको हो, हामी प्राइभेट सेक्टरलाई चाँहिएको हो । राजनीतिक दलहरुले एडभोकेसी गरेर हुँदैन, प्राइभेट सेक्टरले चाह्यो भने सरकारको पनि घुँडा टेकाउन सक्ने हैसियत राख्नुपर्छ । सबै व्यवसायीहरु मिलेर अगाडि बढ्न सके विमानस्थल चलाउन सकिन्छ । सबै छातासंगठनलाई एकजुट बनाएर अगाडि बढ्न सके मात्र विमानस्थल सञ्चालन गर्न सकिन्छ ।
पोखरा उद्योग वाणिज्य सङ्घमा छिमेकी र पूर्व अध्यक्षहरु र राजनीतिक दलहरुको पनि गन्ध आयो भन्ने व्यवसायीहरुको प्रश्न छ नी ?
म कास्कीको मट्टिखानमा जन्मेर सानो व्यवसायबाट नै यहाँसम्म आएको हो । कसै कतैबाट परिचालित भएको छैन । चुनाव भएकाले बाहिरी गन्ध आउनु स्वभाविक हो । रे को पछाडि नलागौं, यसले पोखरालाई कमजोर बनाउँछ । यसले पोखरालाई अझ पछाडि धकेल्छ । जति पनि प्रश्न जिज्ञासा आएका छन् सम्पूर्ण पोखरेलीहरुलाई एकजुट बनाएर त्यसलाई चिर्न सक्नुपर्छ । अन्तमा पोखरा उद्योग वाणिज्य सङ्घमा सबैलाई गोलबन्द गराउन सके पोखराको विकासमा थप इटा थप्न सकिन्छ । मेला महोत्सवलाई परिवर्तन गर्नुपर्छ, सबै क्षेत्रका व्यवसायीहरुलाई एकजुट गराएर अगाडि बढ्नु आजको आवश्यकता हो । यही भदौ २८ र २९ गते पोखरा उद्योग वाणिज्य सङ्घको ३५ औं महाधिवेशनमा अर्जुन पोखरेल प्यानललाई भोट गरी विजयी गराइदिनुहुन् पनि अनुरोध गर्दछु ।
